#DGC Sadaasa 5/2017
Dhaabbanni Teeknoolojii ‘Swift’ konkolaattota Humna Eleetrikaatiin hojjatan 3,000 Magaalaa Dirree Dhawaatti Hojii jalqabsiisuuf Bulchinsa Dirree Dhawaa Wajiin Waliigaltee Mallatteesse.
Sirna sanada waliigaltee mallatteessuu kanarratti argamuun haasaa kan taasisan Kabajamoo Kantiibaa Bulchiinsa Dirree Dhawaa Obbo Kadiir Juhaar hojiilee magaalaa Dirree Dhawaa “Smart” gochuuf hojjetamaa jiruufi tajaajila geejjibaa ammaayyeessuuf bu’aawwan teeknolojii fayyadamuun murteeysaa tahuu ibsan.
Kantiibaa Itti Aanaa Hogganaa Biiroo Daldalaa Industiriifi Invastimantii Bulchiinsa Dirree Dhawaa Obbo Harbii Buuh, gamasaaniitiin Dirree Dhawaa magaalaa ismaartii taasisuuf misooma kooridaraa bulchiinsichatti hojjatamaa jiruuf filannoon geejjiba ammayaa dhihaachuun carraa guddaa tahuu eeranii, Dirree Dhawaa faalama qilleensaarraa bilisa taatee gochuufis konkolaattonni humna ibsaatiin hojjatan fayyadamuun magaalattiif bareedina dabalataa kan dabalu ta’uus himan.
Bakka Bu’aa Dhaabbata ‘Swift Teknolojii’ kan ta’an Obbo Biruuk Ashabbir, yaada miidiyaaf kennaniin waggoottan 3n itti aanan keessatti konkolaattota human elektirikiin hojjetan 3000 ta’an gara magaalattiitti fiduun tajaajila geejjibaa si’ataafi miijataa kennuuf hojitti waliigalticha Bulchinsa Dirree Dhawaafi Baankoo Hojii Gamtaa Oromiyaa waliin sanada waliigaltee mallatteessuu himanii waggatti konkolaattota 1000 fichisiisuuf hojitti seenuufi guyyaa kanattis konkolaattota 21 fayyadamtootaaf furtuu dabarsuu addeeysan.
Konkolaattota elektirikaan hojjatan kunneen dargaggootaaf carraa hojii ballaa uumuu keessattis shoora guddaa qabaachuu kan eeran Obbo Buruk tajaajila liqii dhiheeysuudhaanis namoonni bakka tokkotti kaffalee bitaachuu hindandeenyes fayyadamoo akka ta’aniif Baankii Hojii Gamtaa Oromiyaa waliin kan hojjetan ta’uu ibsaniiti jiran..
Iliyaas Aammeetiin
Suuraa: Salaam Abbabaatiin
