Markii uu ka soo degay Garoonka Diyaaradaha Caalamiga ah ee Dir-Dhabe, Ra’iisul Wasaaraha waxaa si diirran u soo dhaweeyay Duqa Ismaamulka Dir-Dhabe, Mudane Khadir Juhar, Ku-xigeenka Duqa Magaalada Mudane Harbi Buh, xubno ka tirsan maamulka sare ee ismaamulka, odayaasha dhaqanka, culimada diinta, iyo dadweynaha ku dhaqan magaalada.
Socdaalka Ra’iisul Wasaaraha waxaa ku wehlinayay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, iyada oo la qorsheeyay in ay si wadajir ah u booqdaan mashaariic waaweyn oo horumarineed oo ka socda magaalada Dir-Dhabe.
Sidoo kale, Ra’iisul Wasaare Dr. Abiy Ahmed ayaa dhowr saacadood ka hor si rasmi ah u furay Shebelle Resort iyo Warshadda Korontada Dabaysha ee Ayshaca-2, kuwaas oo ah mashaariic istiraatiiji ah oo lagu hirgeliyay barnaamijyo horumarineed, isla markaana laga fuliyay Deegaanka Soomaalida.
Booqashadan ayaa lagu tilmaamay mid xoojinaysa dadaallada horumarinta kaabeyaasha dhaqaalaha, kobcinta maalgashiga, iyo horumarinta adeegyada bulshada ee dalka.
