የኢትዮጵያ እና ጣሊያን ስትራቴጂካዊ ትሥሥር ለአፍሪካ-አውሮፓ ጠንካራ ግንኙነት

በጠቅላይ ሚኒስትር ጆርጂያ ሜሎኒ የሚመራው የጣሊያን መንግሥት “የማቴይ ዕቅድ” በሚባለው አዲስ የፖሊሲ ማዕቀፍ ከአፍሪካ ጋር ያለውን ግንኙነት በከፍተኛ ሁኔታ ቀይሮታል።

ይህ ስትራቴጂ ጣሊያንን በአውሮፓ ኅብረት እና በአፍሪካ መካከል እንደ “ልዩ ድልድይ” የሚመድባት ሲሆን፣ ኢትዮጵያ ደግሞ የአፍሪካ ኅብረት መመልከቻ እና የዲፕሎማሲ ማዕከል በመሆኗ ለዕቅዱ ስኬት እንደ ዋነኛ መልሕቅ ተመርጣለች።

በኢትዮጵያ እና ጣሊያን መካከል ያለው ትሥሥር በእኩልነት እና በተግባራዊ ስትራቴጂካዊ አጋርነት ላይ የተመሠረተ ሆኗል።

ይህ አጋርነት በተጨባጭ የልማት ፕሮጀክቶች የሚገለጽ ሲሆን፣ የጣሊያኑ “ዊ ቢውልድ” ኩባንያ የተሳተፈበት የታላቁ የኢትዮጵያ ሕዳሴ ግድብ የአፍሪካን የራስን ዕድል በራስ የመወሰን ተምሳሌት ነው።

ባለፈው ዓመት በኢትዮጵያ እና ጣሊያን መካከል የተፈረመው የ180 ሚሊዮን ዩሮ ስምምነትም በምግብ ዋስትና፣ በዘመናዊ ግብርና እና በሥራ ዕድል ፈጠራ ላይ ትኩረት አድርጓል።

በተጨማሪም የ”ሥራ ኮሪደሮች” ስምምነት ኢትዮጵያውያን በሕጋዊ መንገድ በጣሊያን የሥራ ዕድል እንዲያገኙ በማመቻቸት ሕገ-ወጥ ስደትን በልማት ለመተካት ያለመ አዲስ ሞዴል ነው።

የዚህ ስኬታማ ጉዞ ማሳያ የሆነውና በአዲስ አበባ የተካሄደው ሁለተኛው የጣሊያን-አፍሪካ ጉባኤ፣ ኢትዮጵያ ለአህጉሪቱ የወደፊት ዕጣ ፈንታ ዋነኛ መግቢያ በር መሆኗን አረጋግጧል።

በዚሁ መድረክ ላይ ንግግር ያደረጉት የጣሊያን ጠቅላይ ሚኒስትር ጆርጂያ ሜሎኒ፣ ለአፍሪካ ሀገራት “የፋይናንስ ፍትሕ” እንዲሰፍን እና የዕዳ ጫና እንዲቀንስ ያላትን ቁርጠኝነት ገልጸዋል።